Herbstusfahrt 2018

Samschtig 22. September 09:00 Uhr. Pünktlich gmäss Tagesbefehl ;-) träffed alli agmäldete im Dorfkafi z`Au/SG i. Nach enere chline Schtärchig simmer Schtartbereit. Trotz zwifelhafte Wätterprognose, zeigt sich da vo sinere beschte Site. Mir fahred via Appezällerland nach Öschtrich dänn witer zum fröhliche Ritt übers Fukajoch in Bregänzerwald und dä Hoger duruf, Hochtannbärgpass, bis Warth zum nächste Kafihalt. Voller Vorfreud uf heiters Kurveschwinge gads übers Hahntennjoch nach Imst, witer richtig Fernpass wo mer dur Schtau churz iprämst wärded und eus zum Mittagshalt entschlüssed. Nachhär witer über Zugspitze, em höchste Berg vo Dütschland, über Garmisch nach Pfronte is Hotel Bergpanorama. Det wärded mir vonere Chuehärde empfange, wo us luter Freud über die schöne Ducatis grad d`Stass vers….. Nach Zimmerbezug, verdientem Znacht und gmüetlichem zämehocke, gaht na dis na jede go Pfuuse. Znacht chunts zwar na go Seiche, aber am Morgä hämmer wider beschts Wätter. Gstärcht nach eme richhaltige Zmorge, freued sich alli uf di nächste Kilometer. I apasstem Tämpo fahred mir über di frei, guet usbaute Strasse im Allgäu richtig heiwärts. Währed de Fahrt wird d`Gruppe ä chli chliner. Dur es paar Umleitige sind mir mit enere Zuesatzschlaufe 2 x am gliche Ort verbi cho! Das cheibe “Fahrer“- Navi hät verseid, sorry. Es paar wenigi bevorzuged jetzt de diräkti Wäg heizue. Z`fride mit eme Grinse im Gsicht, gits underwägs na en Mittagshalt. Di letschte Kilometer über Ravesburg, Sigmaringe, Stockach, Konstanz nämed mir glasse. Zrugg i dä Schwiiz, z`Chrüzlinge, mached mir en churze Abschiedshalt. Dänn de Tämpomat wider uf 80 kmh istelle und für de Rescht gahts jetzt au richtig hei zue. Wie immer isch es en tolle, gsellige Alass gsi, wo au d`Kammeradschaft nöd z`churz chunt. Namal herzliche Dank a Sandra, Adrian, Bruno, Günti, Herbert, Martin, Sepp, Stephan, Thomas, Urs, Urs und Walti, für die glungni Usfahrt und bis zu nächste Mal.

Ruedi

  • 100
  • 105
  • 110
  • 115
  • 116
  • 118
  • 120
  • 122
  • 124
  • 126
  • 130
  • 132
  • 140
  • 142
  • 144
  • 146